പത്തനംതിട്ട: പ്രായപൂര്‍ത്തിയാകാത്ത പെണ്‍കുട്ടിയെ വീട്ടുകാരുടെ അനുമതിയോടെ വിവാഹം ചെയ്തു നല്‍കുകയും കുട്ടി കുഞ്ഞിനു ജന്മം നല്‍കുകയും ചെയ്ത സംഭവത്തില്‍ കൂടുതല്‍ അന്വേഷണത്തിനു പോലീസ്. സംഭവത്തില്‍, കുട്ടിയെ വിവാഹം കഴിച്ച യുവാവും കൂട്ടുനിന്ന കുട്ടിയുടെ അമ്മയും അറസ്റ്റിലായിരുന്നു. ഇവര്‍ റിമാന്‍ഡിലാണ്.
ഏനാത്ത് കടമ്പനാട് വടക്ക് കാട്ടത്താംവിള പുളിവിളയില്‍ ആദിത്യന്‍ (21), പെണ്‍കുട്ടിയുടെ മാതാവ് എന്നിവരാണ് ഏനാത്ത് പോലീസിന്‍റെ പിടിയിലായിരുന്നത്. ഇവര്‍ കേസിലെ ഒന്നും രണ്ടും പ്രതികളാണ്. യുവാവിന്‍റെ മാതാപിതാക്കളെ കേസില്‍ മൂന്നും നാലും പ്രതികളായി ചേര്‍ത്തിട്ടുണ്ട്.
സ്വകാര്യ ബസിലെ കണ്ടക്ടറായിരുന്ന ആദിത്യന്‍ പെണ്‍കുട്ടിയുമായി അടുപ്പത്തിലാകുകയായിരുന്നു. കുട്ടിയുടെ വീട്ടുകാര്‍ അറിഞ്ഞപ്പോള്‍ എതിര്‍ത്തുവെങ്കിലും കൂട്ടാക്കാതെ ബന്ധം തുടരുകയും ഒപ്പം താമസിക്കുകയുമായിരുന്നു. തുടര്‍ന്ന് ഗര്‍ഭിണിയാവുകയും അഞ്ചാംമാസം യുവാവിന്‍റെ മാതാപിതാക്കള്‍ ജോലി ചെയ്യുന്ന വയനാടിനു പോകുകയും ചെയ്തു.
അവിടെവച്ച് പെണ്‍കുട്ടി ഒരാണ്‍കുഞ്ഞിന് ജന്മം നല്‍കി. പ്രസവത്തിനുശേഷം നാല് മാസം കഴിഞ്ഞ് കുഞ്ഞുമായി ഇവിടെ വന്ന് യുവാനൊപ്പം താമസിക്കുകയായിരുന്നു. പെണ്‍കുട്ടിയുടെ സഹോദരനാണ് കഴിഞ്ഞ ദിവസം ചൈല്‍ഡ് ലൈനില്‍ വിളിച്ച് വിവരങ്ങള്‍ പറഞ്ഞത്. തുടര്‍ന്ന്, ജില്ലാ ചൈല്‍ഡ് പ്രൊട്ടക്ഷന് യൂണിറ്റ് അറിയിച്ചതുപ്രകാരം ഏനാത്ത് പോലീസ് നടപടി സ്വീകരിക്കുകയായിരുന്നു.
2022 മുതല്‍ പെണ്‍കുട്ടിയുമായി അടുത്ത യുവാവ് പ്രണയം നടിച്ച് ഇന്‍സ്റ്റഗ്രാമിലൂടെ നിരന്തരം ബന്ധപ്പെട്ട് വിവാഹവാഗ്ദാനം നല്‍കി ബലാത്സംഗത്തിന് വിധേയയാക്കിയെന്നാണ് കേസ്. പെണ്‍കുട്ടിയുടെ അമ്മ താമസിക്കുന്ന വാടകവീട്ടില്‍ നിത്യസന്ദര്‍ശകനായി മാറിയ ഇയാളെ കഴിഞ്ഞ വര്‍ഷം കുട്ടിയുടെ പ്ലസ് വണ്‍ പരീക്ഷാ സമയത്ത് അമ്മ വിളിച്ചുവരുത്തി.
തുടര്‍ന്ന്, ഇയാളുടെ മാതാപിതാക്കളുടെ സമ്മതം വാങ്ങിയശേഷം, കുട്ടിയെ ഇയാള്‍ക്കൊപ്പം ആദിത്യന്‍റെ വീട്ടിലേക്ക് ഇവര്‍ പറഞ്ഞയച്ചു. പിന്നീട് ക്ഷേത്രത്തില്‍ വച്ച് ഇരുവരുടെയും താലികെട്ടു നടക്കുകയും, ഭാര്യാഭര്‍ത്താക്കന്മാരെപ്പോലെ കഴിഞ്ഞുവരികയുമായിരുന്നു.
നിയമാനുസൃതമല്ലാത്ത വിവാഹത്തിന് കൂട്ടുനിന്നതായും നിയമാനുസൃത രക്ഷാകര്‍തൃത്വത്തില്‍ നിന്നും മനപ്പൂര്‍വം ഒഴിവാകണമെന്നുമുള്ള ഉദ്ദേശത്തോടെയാണ് ഇവര്‍ കുട്ടിയെ യുവാവിനോപ്പം അയച്ചതെന്നും അന്വേഷണത്തില്‍ വ്യക്തമായി.
തുടര്‍ന്ന് കുട്ടി ഗര്‍ഭിണിയായപ്പോള്‍ ഇത് മറച്ചുവയ്ക്കാനായി പ്രതിയുടെ മാതാപിതാക്കള്‍ ജോലി ചെയ്യുന്ന വയനാട്ടിൽ ഇവര്‍ എത്തിച്ചു. അവിടെ കൈനാടി ഗവൺമെന്‍റ് ആശുപത്രിയില്‍ പ്രസവം നടന്നതെന്നാണ് മൊഴി. ആശുപത്രിയിലെത്തിയപ്പോള്‍ നല്‍കിയ വിലാസം, കുട്ടിയുടെ പ്രായം തുടങ്ങിയ വിവരങ്ങള്‍ ശേഖരിക്കുമെന്ന് പോലീസ് പറഞ്ഞു.
ഗുരുതരമായ കുറ്റകൃത്യമാണന്ന് ബോധ്യപ്പെട്ടതിനേത്തുടര്‍ന്ന് ബലാത്സംഗത്തിനും പോക്സോ നിയമപ്രകാരവും ബാലനീതി നിയമമനുസരിച്ചും ബാലവിവാഹനിരോധന നിയമം വകുപ്പ് പ്രകാരവും കേസ് രജിസ്റ്റര്‍ ചെയ്തായി പോലീസ് പറഞ്ഞു. ശാസ്താംകോട്ട പോലീസ് സ്റ്റേഷനില്‍ നേരത്തെ രജിസ്റ്റര്‍ ചെയ്ത പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസിലും ആദിത്യന്‍ പ്രതിയാണ്.
